عزلة_حبيبه

عزلة حبيبه عن الوطن
لما الوطن يكون حبيبه
و الحبيبه تكون وطن
إختزلت الأحلام و أوجاع الحكايه
فى طلب ضئيل
…..
ممكن إيديك ما تسيبش إيدى
قبل اللقا و بعد الرحيل
…..
ما انا عارفه ان وجودنا فى رحاب بعضنا
شئ مستحيل
يمكن بيحصل فى بعض أيام أو شهور
أو كام سنه
نقدر نحارب فيهم
البعد و آهاته
و نكمل السكه بخطاوى المشتاقين
لكن لفتره و هتنتهى
……
زى إللى قبلنا و إللى بعدنا نتلهى
يا إما بنفوس غيرتها تقلبات
أو بإنتهاء أجل إللى قال
هأفضل هنا
أو بإستحالة القرب مع وعد و مكتوب
عنده لفراقنا ألف دليل
أو حتى بوجود البديل
……
أقصد لو المحظور حصل
و فارقتنى
أو ماتت اللحظه إللى ضمت حلمنا
خليك هنا
……
ما تغيبش أبدا غير بإذنى
و بعد ما أشبع
فيك غرام
ولاد الحرام ما بيصطادوش
غير فى التمنى
يا غنوه مهما سمعتها
و حفظتها روحى
ترجع تغنى
……
تخطفنى من نفسى و حاجات بتهدنى
و تشدنى لعزله القمر
فيها كان خليل
منديل بيمسح
دمعه من خد الجميل
و يرد روح ممنوعه بوح
مش قادره حلم
……
العزله دى كانت و لسه
عكاز وصال
ما فرقش بين ممكن و محال
و لا بين موجود
و مش موجود
عزلة وطن
عن مخلصين بيكبروه
ميدان و هان
على دباباته عهد الشهيد
……
مواعيد بتشهد
على إللى باع كل القضايا
و إللى اشترى دموع الصبايا
و إللى مش قادر يواجه
نفسه ابدا فى المرايا
و إللى بيلاقى فى هروبه من الحقيقه
تفاصيل بريئه
……
بتشد أزره و توصل الشوق بالأمانى
يقدر من تانى
يكمل السكه إللى مكتوب
فوق جبينه
يعيشها حتى من غير حنينه

هانى_آدم