رسائل_منسيه

عابر سبيل بيميل على المسكوت
يبل ريقه بكلمتين دايبين
فى بحر شوق الحرقه و الحرمان
يبان على العاصى بداية الهدى
القافيه مش بالعافيه و لا بالذوق
القافيه حق لكل عاشق المجاز
إنجاز فى أرض الخوف يبل الريق
و يعشم الغلبان بقوضه و علاج
محتاج لمين يا حزين فى أحزانك
إذا كان مكان الهوان بيشتاقك
بلبل و ساب جناحاته فى العشه
رفض الغريق الدعم من قشه
شارع قديم كان فيه الجدع سايق
على البنيه الورد و الدباديب
و الله كانت الشمس مهما تغيب
ما تغيب حبيبته عن الوجود ساعه
و لا يختفى التأثير من التفسير
سكران بعشقها حتى و أنا فايق
و فاكرها مهما يغيروا المقادير
طعم الحاجات الحلوه مش للبيع
و لا ينفع المقتول بشوق و غرام
تغيره الدنيا أو الأيام
لبست روحك فى القصيده
و مت على باب القبول
معقول تموت قبل أما تفتحلك بشوق
و قبل ما تشوف إبتسامتك
و هى غرقانه فى العرق
و قبل ما تخلص كلام
مين قطع الجوابات يا أعداء الحياه
مين إللى قفل الباب بمليون سلسله
مين إللى منع النور يعدى الشيش
و يبل ريق المحبوسين تحقيق
يا رساله هربت من ساعى التوصيل
سبقت عجل عربية الإسعاف
نسيوها علشان معندهاش إسفاف
ماتت و قالوا رساله منسيه
و المنسى عمره ما حقق الأحلام

هانى_آدم